Eg og Cristoph med noko godt og kaldt i glaset, samt gratis tapas










Eit bilete av olivenoljeavdelinga på supermercadoen: kanskje er dette forklaringa på at det er lite hjerte- og karsjukdommar rundt middelhavet?










Alhambra, ei spektaulaer borg fraa 1200-talet som ligg midt i byen, og som forovrig er paa UNESCO si verdsarvliste. I tillegg har Alhambra ein enorm hage, Generalife, som ligg til venstre paa bildet som eg trur Tante Liv hadde likt









Flott solnedgang pa Embalse de Canales, 958 moh












Padling

Då var det igjen tid for ei lita oppdatering av stoda sørpå. Sidan sist har veret gjort eit aldri så lite skifte. Det er no normalt med rundt 19 – 25 grader på dagtid, medan gradestokken kryp eit stykke til nedover på natta. Med andre ord, det er rett og slett kaldt her. Eg har difor måtte gå til det steget å ta på meg genseren som eg tok av meg då eg landa på flyplassen i Malaga 9. august, samt ei dongeribukse. I tillegg har det kome litt regn nokre dagar. No skal eg ikkje klage på veret, det er i grunnen flott at veret etter kvart byrjar å skifte, for då har vi som bor på desse breiddegrader noko å prate om.

Elles har eg funne ei ny leilegheit å bu i. No når språkskulen straks er over og Universidad de Granada står for tur, treng eg eit nytt krypinn. Eg har takka ja til eit rom i ei leilegheit med to andre franske gutar og skal flytte inn neste helg. Leilegheita er veldig typisk spansk og rommet er heller ikkje særlig stort. Men så lenge eg får ei seng, skrivepult, internett og eit leselys er eg nøgd. Leilegheita er fullt utstyrt med alt ein treng; dvs møblar, vaskemaskin og TV, samt koppar og kar på kjøkkenet. Det følgde også med pute og sengetøy på rommet. Husvertane, eit eldre ektepar, bor like ved og var svært hyggelige. Dette ekteparet, som forøvrig var unge då Franco hadde si stordomstid, kunne ikkje eit kløyva ord engelsk. I og med at alderen hadde satt sitt preg på talehastigheita, var det mogleg å forstå noko av det som vart sagt under visninga. Eg svarte også bekreftande eit par gongar på nokre spørsmål eg ikkje forstod før eg satt nasa heimover. Kva eg svarte ja på får tida vise.

På språkskulen merkar eg at grammatikken byrjar å ta seg opp. Eg innser at det er på tide å sette seg ned å studere litt på kveldane. Spansken går framover, men eg erkjenner at det er ein lang prosess å lære eit språk. Då er det godt å vite at noko

så triveleg som det å gå på butikken eller på gata, og vidare lese på etikkar eller plakatar, erstattar ei heller kjedelig runde med glosepugging. Elles registrerar eg at alt på TV blir dubba. Alt frå intervju med engelskmenn på nyhendene til seriar og filmar. Sånn sett er det lett å forstå at mange spanjolar ikkje ser det store i å lære seg engelsk.

Eg har også vore litt aktiv denne veka, forutan mine halvhjerta symjeturar på treningssenteret. Eg og tre kameratar betalte 15 euro for å få padle kanoar. Padlinga føregjekk 15 km utanfor sentrum av Granada på Embalse de Canales, som er eit kunstig vatn/vassreservoar 958 moh. Denne dammen er også både eit magasin for kraftproduksjon, samt drikkevatn for Granada. Temperaturen i vatnet inviterte til bading, noko som ikkje var forbode. Det var heller ingen på turen eller lærarane mine som heva augebryna over at det var fullt lovleg å bade i dette drikkevatnet. Naturopplevingane var storslåtte og padling er i grunnen snyta kjekt. Det einaste å sette ein finger på var at sjåføren vår bøtta ned ei ølboks før han kasta seg bak rattet for å kjøre oss heim. No er nok mest sannsynleg promillegrensa ein del høgare i Spania, sjølv om EU har stramma inn, enn i Noreg. Og bil- og alkoholkulturen er kanskje også annleis. Likevel følte eg meg ikkje heilt trygg på dei store og flotte motorvegane då vi kjørte heim.

Ein annan dag var eg med den same gjengen og prøvde ut det andre arabiske badet i byen. Her var det eit kaldt basseng, og 6 andre basseng med varmt vatn. Det skulle visstnok vere ulik temperatur i alle bassenga, men eg klarte kun å skilje mellom kaldt, varmt, og veldig varmt. Eg må innrømme at eg synst det førre arabiske badet, som eg besøkte for nokre veker sidan, var mykje betre og meir gjennomført. Men i og med at det var studentpris her var det i grunnen ikkje så dumt likevel.